Талибанците најавија општа амнестија

Како ќе изгледа владата на Авганистан по преземањето на власта од страна на талибанците сѐ уште не се знае. Тие најавија амнестија за службениците и тврдат дека жени во владата се добредојдени.

Радикално исламистичките талибанци им понудија амнестија на сите вработени во владини институции во Авганистан. Исламистите бараат од службениците да се вратат на своите работни места: „Би требало со целосна доверба да се вратат на своето секојдневие“, се вели во соопштението на исламистите.

Во телевизиски настап на член на Комисијата за култура на талибанците од жените беше побарано да учествуваат во владата. „Исламскиот Емират не сака жените да станат жртви“, изјави Енамулах Самангани на државната телевизија, која во меѓувреме е под контрола на талибанците. Тие би требало да работат во владата согласно исламските закони.

Самангани дополни: „Структурата на владата не е сосема јасна, но врз основа на искуството, би требало да има чисто исламско раководство и сите страни би требало да се приклучат.“ Самангани не наведе попрецизно што се мисли под тоа.

Талибанците во моментов се обидуваат да бидат умерени во јавните настапи, но многу Авганистанци остануваат скептични. Враќањето на исламистите на власт предизвика запрепастеност ширум светот и загриженост пред сѐ на жените во земјата.

Од Канцеларијата на Комесарот на ОН за човекови права е упатено барање до талибанците да внимаваат на почитувањето на човековите права во земјата. Новите властодршци мора „со своето делување, а не со зборови, да покажат дека ги земаат сериозно предвид стравувањата за безбедноста на безброј луѓе од различни општествени слоеви“, изјави Руперт Колвил, портпарол на комесарката за човекови права Мишел Бачелет. Колвил укажа на изјавите на претставници на талибанците дека нема да ги казнуваат соработниците на претходната влада и дека ќе им остават можност на жените за образование и работа. Ваквите изјави, „со оглед на минатото, разбирливо“ наидуваат на скепса, вели Колвил. Оттука, многу внимателно ќе се следи дали талибанците се држат до ветеното.

Извор: DW