ПУБЛИКУМ Вистината на прво место
Симптоматично е што палењето на пругата и онеспособувањето на сообраќајот се случува речиси на идентичната локација во Општина Долнени
За помалку од два месеца, по трет пат се запалени дрвени прагови од пругата Велес-Битола во северниот дел од Пелагонискиот регион. Поради ова, во прекин е железничкиот сообраќај на релацијата Скопје-Битола-Скопје. Симптоматично е што палењето на пругата и онеспособувањето на сообраќајот се случува речиси на идентичната локација во Општина Долнени.
Од Центарот за управување со кризи информираат дека била запалена ниска вегетација и прагови од железничка пруга помеѓу селата Слепче и Браилово, при што пожарот го гаснеле пожарникари од прилепската протипожарна бригада. Поради пожарот, во прекин е сообраќањето на единствениот патнички воз на релацијата Скопје-Битола-Скопје.
Пругата најпрво беше затворена за сообраќај на 23 септември годинава, откако без изгорени прагови во пожарот на територијата на општина Долнени. Со денови не сообраќаа патничките возови меѓу Скопје и Битола.
Само неколку дена откога беше воспоставен патничкиот железнички сообраќај меѓу Скопје и Битола, на 12 октомври повторно имаше пожар што зафати прагови од пругата кај селото Браилово. Поради ова, повторно во прекин беше железничкиот сообраќај на пругата меѓу Скопје и Битола.
Инаку, од 25 октомври годинава беа укинати од сообраќај два патнички воза на релацијата Скопје-Битола-Скопје, а остана во функција единствено возот од Скопје за Битола кој поаѓа од 14:30 часот, како и од Битола за Скопје кој поаѓа од 3:13 часот.
