Украинското МНР бара помош од меѓународната заедница по интензивните руски напади врз цивилни објекти

Ноќта на 2 јануари, Руската Федерација изврши уште еден масoвен ракетен напад врз украинските градови. Непријателот лансираше десетици ударни беспилотни летала, крстосувачки и аеробалистички ракети врз Кијив, Харкив, Миколајив, Кропивницкиј и други населени области, објави денеска Министерството за надворешни работи на Украина, а пренесе украинската амбасада во земјава.

Од украинското МНР велат дека во Кијив се регистрирани голем број уништувања, вклучително и удари во станбени згради, магацински простории, супермаркет, гасна инфраструктура, а во некои реони на главниот град нема струја и вода.

„Руската Федерација исто така нападна и станбени области на Харкив. Заклучно со утрово веќе се знае за 92 ранети и 4 починати лица. Имајќи предвид дека операциите за пребарување и спасување се во тек, бројот на жртви може да се зголеми. Русија продолжува да војува против украинските жени, деца и постари лица. Објектите кои ги нападна руската армија беа исклучиво цивилни“, велат од украинското МНР.

Министерот за надворешни работи, Дмитро Кулеба, ги повика странските земји решително да реагираат и на овој руски терористички напад со преземање сет мерки, кои, меѓу другото, ќе вклучуваат и забрзување на снабдувањето на Украина со дополнителни системи за противвоздушна одбрана, борбени дронови од секаков тип, ракети со долг дострел со дострел од 300+ километри, донесувајќи одлука за пренос на замрзнатите руски средства за потребите на Украина и прекинување на контактите со руските дипломати во соодветните престолнини и меѓународни организации.

„Терористичкиот режим во Москва мора да почувствува дека меѓународната заедница нема да затвора очи пред убиството на цивилното украинско население и уништувањето на украинската критична инфраструктура“, велат од украинското МНР.

Извор: МЕТА