Вистиномер: Старо видео од антивакцинални протести претставено како да е ново за смена на италијанската власт

Иако, во објавата не е експлицитно наведено, јасно е дека се инсинуира оти протестот е наводно поради тоа што се бара оставка од премиерот на Италија, Марио Драги. Меѓутоа, видеото од протестот не е поради наведената причина, односно поради тоа што се бара оставка од италијанскиот премиер, туку е против мерките кои во Италија стапија на сила во 2021 година во октомври. Не станува збор за неодамнешни протести, туку протести кои се одвивале лани, а се однесуваат на ковид пандемијата и несогласувањето на дел од италијанските граѓани со мерките кои стапиле на сила во тој временски период.

На видеоматеријалот се гледа поголема група на луѓе, кои протестираат и го веат италијанското знаме. Сепак, видеото е објавено на 9 октомври 2021 година и го прикажува протестот на кој учесниците тогаш го изразија своето незадоволство од одлуката на владата зелениот пас да го направи задолжителен за сите работници.

На 9 октомври 2021 година италијанските медиуми опширно известувале од настанот. Видео материјал од истиот протест објавен е во октомври во склоп на медиумски напис кој пишува дека станува збор за протест поради незадоволство на граѓаните од ковид мерките.

Сите светски медиуми го покрија овој протест вклучително и „Ројтерс“:

Италијанската полиција користеше солзавец во саботата за да ја разбие толпата од стотици луѓе, вклучително и неофашистички активисти кои демонстрираа во Рим против желбата на владата ад го направи задолжителен зелениот пас за сите работници. Една група која протестираше се обиде да го пробие полицискиот кордон и да дојде до канцеларијата на премиерот Марио Драги во центарот.

И руски медиуми  објавија дека станува збор за протест во Рим против ковид пасошот, а беше споделен и видеоматеријалот којшто сведочи за целокупната атмосфера.

Протестите се случија неколку денови пред земјата да стане првата во Европа која ќе спроведе правило сите работници да покажуваат грин пас во обид да се забрза вакцинацијата против ковид-19 и да се сопре ширењето на инфекциите со коронавирусот.

Италија го отстрани барањето за сертификат Грин Пас за своите граѓани на 1 мај годинава, а на 1 јуни и за сите патници кои влегуваат во земјата.

За разлика од постот што е предмет на нашата рецензија и кој инсинуира дека протестите се скорешни, „Вистиномер“ не успеа да најде никаква потврда дека во моментот во Италија се одвиваат протести за смена на Марио Драги. Исто така, со сигурност може да се потврди дека видео материјалот споделен во постот, потекнува од протести кои се одржале во Италија на крајот на 2021 година и биле поврзани со задолжителното покажување на Грин Пас за сите работници во Италија.

Поради сите горенаведени факти, оценуваме дека во постот што го рецензираме, се пропушта контекстот. Видеото е веродостојно, меѓутоа временската рамка во која се случил протестот не е јули 2022 година.