Синоќа во Никшиќ, Црна Гора, на Фестивалот на актерот, ансамблот на театарот „Војдан Чернодрински“ ја изведе претставата „Љубовни пози на историјата„ (Figurae , veneris, historiae) од Горан Стефановски, во режија на Наташа Поплавска, која прилепскиот театар ја изведе во чест на неодамна починатиот Горан Стефановски.
Публиката и актерите со громогласен аплауз му оддадоа почит на големиот македонски драмски автор, кој зад себе остави дела кои вечно ќе живеат.
Стефановски, кој е добитник на шест награди на фестивалот „Војдан Чернодрински“ и две Стериини награди, е автор на над 30 драми, меѓу кои „Јане Задрогаз“, „Диво месо“, „Лет во место“, „Тетовирани души“, „Кула Вавилонска“ „Баханалии“, како и на култната ТВ серија „Бушава азбука“.
На сцената од прилепскиот театар освен „Љубовни пози на историјата“, поставени биле уште 3 други текстови на Стефановски: „Хај фај“, „Диво месо“ и „Јане Задрогаз“.
Претставата на Стефановски, „Љубовни пози на историјата“, која отвора бројни прашања во однос на војната, љубовта, интимата, политиката и моралноста, на фестивалот во Никшиќ наиде на одличен прием кај публиката.