ПУБЛИКУМ Вистината на прво место
Јавното претпријатие за државни патишта планира наредниот месец да го објави тендерот за избор на градежна компанија што ќе ја доврши изградбата на првата фаза од експресниот пат Градско – Прилеп. Неколкумесечниот застој на изведбата на 10-те нови километри меѓу Фаришката и Дреновската клисура настанаа откако изминатово лето беше раскинат договорот со претходниот изведувач „Конструксионес Рубау С.А.“, а двете страни меѓусебно се обвинуваа за причините за раскинување на договорот и се одлучија разрешницата да ја бараат на арбитражен суд.
– Арбитражата ќе се тера една или две години, тоа се такви постапки. Не зависат од нас – изјави директорот на ЈП за државни патишта, Зоран Китанов, на вчерашната прес – конференција одржана во владата.
Арбитражната постапка меѓу ЈП за државни патишта и шпанскиот изведувач ќе продолжи, но таа е целосно одвоена од довршувањето на изградбата на експресниот пат. Експерти од Европската банка за обнова и развој (ЕБОР), која ги позајмува средствата за изградба на првата фаза, месецов биле во земјава и е договорено да се продолжи со изведба на градежните работи. Со ангажираните експерти направен е пресек на целиот проект, утврдено е дека досега се завршени околу 35 отсто од градежните работи, додека преостанатите сегменти што треба да се довршат ќе ги гради нова компанија што треба допрва да се избере.
– Очекувајте во јануари да се објави тендерот. Пролетта овој пат ќе продолжи да се работи – изјави директорот Зоран Китанов.
Експресниот пат Градско – Прилеп се гради во три фази. Во моментов непречено се одвива изведбата на трасата меѓу Градско и Дреновската клисура, а допрва треба да започне изведбата на третата фаза од Прилеп до мостот на Ленишка река и од село Беловодица до каменоломот „Маврово“. Целокупниот експресен пат од Коридорот 10д треба да биде завршен до крајот на 2022 година.
Извор: МЕТА
