Во Маврово се одржува дводневниот параглајдинг натпревар „Маврово Опен 2021“

Денеска и утре во Маврово се одржува традиционалниот параглајдинг натпревар „Маврово Опен 2021″.

Оваа година натпреварот има поголемо значење бидејќи е дел од Евро Куп серијалот, кој се одржува на 5 локации во светот, вклучувајќи го и Маврово.

На терените кај жичарите прецизно ќе слетуваат пилоти на параглајдер од Балканот и Европа. Маврово е особено привлечно за параглајдери поради прекрасниот пејсаж над Мавровско езеро.

Организатор на настанот се параглајдинг клуб „Кондор“ од Гостивар и Воздухопловната Федерација на Македонија. Овој настан доби поддршка и од Агенцијата за млади и спорт.

Еден од организаторите на настанот, Ментор Саити, вели дека натпреварот е можност да се ужива во техниката на параглајдеристите кои ќе се борат што попрецизно да слетаат во целта и дека е многу важна поддршката која организаторот ја добил од Воздухопловната Федерација и од Агенцијата за млади и спорт.

Генералната секретарка на Воздухопловната Федерација, Билјана Еверет, истакнува дека особен предизвик и за организација на натпреварот претставува учеството на натпреварувачи од странство, а посетителите ќе можат да уживаат и во планинскиот воздух.

Овој викенд е значаен и од еден друг аспект. Имено, за прв пат во историјата на воздухопловството, денеска во Маврово ќе биде формирана првата Комисија за жени во овој спорт.

Формирањето на комисијата е реализирано со поддршка на Агенцијата за млади и спорт и Владата на РСМ. Во комисијата ќе членуваат натпреварувачки од различни спортови: падобранство, параглајдинг, моделарство, авијатика, едриличарство, кои ќе се ангажираат за доброто на жените во спортот.