Убиен обвинителот кој го истражуваше телевизискиот упад во Еквадор

Обвинителот кој го истражуваше упадот во телевизиското студио во Еквадор бил убиен минатата недела, соопштија официјални лица, а пренесува Би-Би-Си.

Обвинителот Сезар Суарез бил застрелан во пристанишниот град Гвајакил во провинцијата Гвајас, изјави еквадорскиот главен јавен обвинител. Тој бил убиен во близина на неговата канцеларија.

Не е јасно дали смртта на Суарез е поврзана со неговата истрага за нападот во телевизиското студио.

За време на драматичниот инцидент минатата недела, маскирани лица упаднаа во студиото на државната телевизија „ТЦ“ за време на пренос во живо, при што на вработените им се закануваа со пиштол. Снимките беа емитувани во живо, пред преносот да биде прекинат.

Еден снимател бил застрелан во ногата, додека на друг му била скршена раката.

Во интервју за весникот „Ел Универзо“, само еден ден пред убиството, обвинителот Суарез рекол дека не добил полициска заштита и покрај тоа што ги испрашувал 13-те лица уапсени во нападот.

Неговото убиство е последно во бранот насилни инциденти низ Еквадор, откако двајца водачи на банди побегнаа од затвор, а стотици затворски чувари беа земени како заложници. Регистрирани беа и повеќе експлозии во неколку градови низ земјата.

Како одговор на ситуацијата, еквадорскиот претседател Даниел Нобоа прогласи 60-дневна вонредна состојба и ѝ нареди на војската да „неутрализира“ 22 вооружени групи кои беа дефинирани како „терористички организации“.

Извор: МЕТА