23 години од смртта на принцезата Дајана

На денешен ден пред 23 години, во сообраќајна несреќа загина принцезата Дајана, првата сопруга на Чарлс, принцот од Велс, најстариот син и наследник на кралицата Елизабета Втора.

Според официјалните информации, автомобилот на Дајана во кој се наоѓале и нејзиниот тогашен партнер Доди Ал-Фајед и возачот Хенри Пол, околу полноќ се забил во еден од столбовите на тунелот во Париз, каде Дајана и Ал-Фајед го поминувале својот одмор. Возачот и Доди загинале на местото на несреќата, додека Дајана починала во болница, 4 часа подоцна.

И денес, 23 години после нејзината трагична смрт, принцезата Дајана останува една од најважните членови на кралското семејство во поновата историја. Истовремено не престануваат ниту шпекулациите и теориите на заговор, од тоа дека нејзината смрт е последица на трагична несреќа, до тоа дека се’ било испланирано и наместено.

Принцезата Дајана, или како што во целиот свет ја викаа „Лејди Ди, принцеза на народот“, е погребана на остров среде езерото, на семејниот имот Алторп.