Со спуштање на барјакот на слободата, синоќа заврши манифестацијата НКС „Десет дена Крушевска Република“

Со настапот на бендот „Инвиктус“ и спуштање и засолнување на барјакот на слободата, синоќа беше затворена манифестацијата НКС „Десет дена Крушевска Република“.

Годинешната програма понуди богата содржина, а градоначалникот на општина Крушево и претседател на Советот на НКС „Десет дена Крушевска Република“, Томе Христоски, изрази задоволство што преку манифестацијата се промовира богатото културно богатство.

„Драго ми е што понудивме многу содржини во рамки на програмата и тоа е препознато кај посетителите. Преку понудените содржини, во изминатите 10 дена го промовираме изворното наследство на Крушево и на Северна Македонија. Тоа е нашата традиција и култура изразена преку музички групи, изложби, ревии и слично“, изјави Христоски.

Од Општина Крушево изразуваат задоволство заради големата посетеност на НКС „Десет дена Крушевска Република“ во сите 10 дена од нејзиното траење, а таквата посетеност на Крушево се очекува да продолжи до крајот на август.