Дизелот поевтинува за 5, бензините за 3,5 и 4 денари за литар

Од ноќеска на полноќ поевтинуваат сите горива, соопшти Регулаторната комисија за енергетика и водни услуги (РКЕВУ). Така, малопродажната цена на ЕУРОДИЗЕЛ се намалува за дури 5 денари за литар, со што од ноќеска литар дизел гориво ќе се продава по цена од 79,5 денари. Исто толку ќе чини и моторниот бензин ЕУРОСУПЕР БС-98, чија цена се намалува за 4 денари за литар.

ЕУРОСУПЕР БС-95 поевтинува за 3,5 денари за литар и од полноќ на бензинските станици низ земјава ќе се продава за 77,5 денари за литар.

Малопродажната цена на Екстра лесното масло за домаќинство се намалува за 4,50 денари за литар и ќе чини 77 денари, додека мазутот поевтинува за 2,115 денари за килограм и ќе чини 40,056 денари.