ПУБЛИКУМ Вистината на прво место
Елвин Хасан, министерот без ресор задолжен за странски инвестиции, беше во работна посета на фабриката “Liberty Skopje”, која е дел од глобалната “Liberty House Group”, британска компанија која се фокусира на трговија со црни и обоени материјали, рециклирање на метали, производство на челик и алуминиум и инжинерски производи и услуги.
Liberty House Group пред одреден период ја презеде валавницата од АцелорМиттал во Скопје и неколку други европски земји. При посетата, министерот Хасан го посети и производствениот погон каде што увиде кои се капацитетите на фабриката, како тече секојдневната работа и какви машини се користат во процесот.
Извршниот директор на фирмата, Волфганг Марингер го запозна министерот со историјата и почетоците на компанијата која кај нас почнала со работа уште во 2005 година и која има околу 470 вработени и која соработува со над 300 домашни компании. Директорот Марингер на министерот му ги презентираше моменталните услови за работа, плановите и целите за во иднина, кои вклучуваат зголемување на капацитетите и стремежот кон градење на безбедна работна средина во која вработените се заштитени, бидејќи еден од примарните таргети на компанијата е здравјето и безбедноста.
Министерот Хасан ја искористи оваа прилика да ги презентира новите измени на Законот за финансиска поддршка на инвестиции, кои се произлезени од потребите изразени од компаниите и со цел да се охрабрат инвеститорите за нови инвестирања во земјава.
