Најмалку 93 мртви во нападот кај Москва, уапсени четворица терористи

Најмалку 93 лица се убиени во пукањето во концертна сала во близина на Москва, јави руската државна новинска агенција РИА, а руските служби потврдија дека се уапсени четворица терористи по нападот во петокот, 22 март, за кој одговорноста ја презеде екстремистичката група наречена „Исламска држава“.

Руското министерство ги објави имињата на ранетите. На списокот има 121 лице.

Шефот на Федералната служба за безбедност (ФСБ) го информирал рускиот претседател Владимир Путин за приведувањето на 11 лица, меѓу кои и четворица терористи директно вклучени во терористичкиот напад врз Крокус, објави Кремљ, пренесе агенцијата Ројтерс.

Одговорноста за нападот ја презеде екстремистичката група наречена „Исламска држава“, која на Телеграм наведе дека нејзини членови „извршиле напад во голем собир кој се одржувал во преградие на руската престолнина Москва“.

Нападот во концертната сала Крокус во Красногорск во близина на Москва се случи пред настапот на групата Пикник. Руските медиуми јавија дека напаѓачите фрлале експлозиви што предизвикало голем пожар во концертниот простор кој собира околу 6.000 луѓе.

Белата куќа соопшти дека нема индикации дека Украина е вмешана во нападот.

„Засега нема индикации дека Украина или Украинци биле вмешани во пукањето“, изјави за новинарите портпаролот на Советот за национална безбедност Џон Кирби.

Русија рече дека ако САД со сигурност знаат дека Украина не е вмешана во пукањето во концертната сала во близина на Москва, Вашингтон треба да ги сподели сите информации што ги има.

„На која основа официјалните лица во Вашингтон донесуваат заклучоци за нечија невиност среде трагедија“, изјави портпаролката на Министерството за надворешни работи на Русија, Марија Захарова.

Извор: РСЕ