Почина легендарниот хрватски фудбалски тренер Ќиро Блажевиќ

На 88-годишна возраст, денеска почина легендарниот хрватски фудбалски тренер Мирослав Ќиро Блажевиќ.

Ќиро Блажевиќ е роден во босанскиот град Травник во 1935 година. Играл за хрватските клубови Локомотива, Динамо и Риека, за Сараево и швајцарски Сион и имал скромна играчка кариера. Тренерската професија ја започнал во Швајцарија во 1968 година, при што тренирал триесетина клубови и репрезентации на повеќе континенти.

Најголемите успеси ги постигнал со загрепски Динамо кога во 1982 година станал првак на Југославија, како и со репрезентацијата на Хрватска со која во 1998 година го освои третото место на Светското првенство во Франција.

Блажевиќ е единствениот тренер кој со Динамо освои шампионски титули, како и фудбалскиот куп и во СФРЈ и во Хрватска

Беше тренер на Динамо во четири мандати и освоил три шампионски титули, два купа и еден Суперкуп.

Репрезентацијата на Хрватска ја водеше 72 пати, забележувајќи 33 победи, 24 нерешени натпревари и 15 порази.

Ќиро Блажевиќ беше единствениот кој Државната награда за спорт „Фрањо Бучар“ ја доби три пати, а последниот јавен настап го имаше во декември минатата година, кога во Загреб, за придонес во во развојот на спортската култура ја доби наградата „Владимир Беара“.