ПУБЛИКУМ Вистината на прво место
Претседателот на Владата на Република Северна Македонија, Зоран Заев по покана добиена од канцеларката на Сојузна Република Германија, Ангела Меркел и претседателот на Република Франција, Емануел Макрон ќе учествува на Конференција на шефови на држави и влади од ЕУ и од земјите на Западен Балкан, којашто ќе се одржи во Берлин, денеска, 29 април 2019 година, во попладневните часови. Владината делегација предводена од премиерот Заев ја сочинуваат и заменик претседателот на Владата задолжен за европски прашања, Бујар Османи и министерот за надворешни работи, Никола Димитров.
Целта на состанокот е да се обезбеди дискусија за политичката ситуација во регионот на Западен Балкан. Фокусот на разговорите ќе биде ставен на можностите за унапредување на регионалната соработка и решавање на отворените прашања, како на пример нормализација на дијалогот меѓу Србија и Косово.
Во светло на поставените теми за дискусија, успешните договори со Бугарија и Грција, и пристапот на надминување на проблемите и пријателството што го гради Северна Македонија, претставуваат модел што другите можат да го следат.
Заеднички интерес на сите држави и народи е да има мир и стабилност во регионот, подобрување на регионалната соработка, унапредување на економската соработка, посветеност на демократските реформи и забрзување на процесот на ЕУ интеграции.
На маргините на посетата, премиерот Заев и делегацијата ќе имаат можност за билатерални средби со другите шефови на држави и влади.
