ПУБЛИКУМ Вистината на прво место
Прес-конференција на Филип Попоски, член на УО на „Водовод и канализација“ Прилеп
Почитувани,
Завршната сметка на „Водовод и канализација“ за 2022 година покажа дека, за прв пат во своето постоење како самостоен субјект, јавното претпријатие бележи загуби во висина од 8.160.000 денари.
Ако на оваа сума се додадат и оние 3.900.000 денари добивка со кои претпријатието ја заврши 2021 година, тоа значи дека за 17 месеци директорување со ЈКП „Водовод и канализација“, Игор Гулабоски направил финансиска „дупка“ од 12 милиони денари.
Дополнително неподмирените обврски кон добавувачи изнесуваат околу 9 милиони денари со што ова јавно претпријатие е доведено на работ на егзистенција.
Неговото недомаќинско и нестручно работење се гледа и во неразумното и неоправдано унапредување на десетина партиски војници на ВМРО-ДПМНЕ, кои дополнително ги награди со високи плати во висина од 1.000 евра.
Гулабоски измисли и нови работни места за вдомување на актуелни функционери на ДПМНЕ и нивни блиски роднини.
Директорот на јавното претпријатие не го исполни ниту изборното ветување на неговиот другар Борче Јовчески за намалување на цената на водата. Напротив, дополнително и ја зголеми. Во претходниот период драстично се зголемени трошоците за гориво и сервисирање на возила како и трошоци за реклама и пропаганда.
Меѓутоа, она што треба да се потенцира и што најдобро ја покажува неспособноста на Гулабоски да го менаџира до скоро најуспешното јавно претпријатие во Прилеп, се официјалните бројки за сработеното во неговиот мандат.
А тие велат дека во изминатите 17 месеци, ЈКП „Водовод и канализација“ успеало да изгради 2 км водоводна и “дури“ 170 метра канализациона мрежа!
Да повторам: во 17 месеци, срамни 2 км водоводна и уште посрамни 170 метра канализациона мрежа!
Почитувани граѓани,
Вакво неработење и вакви поразителни резултати на едно јавно претпријатие, не се паметат. Единствена причина што Гулабоски сеуште е директор на „Водовод и канализација“, е што е другар на градоначалникот Јовчески.
Заради сето погоре кажаното, Игор Гулабоски треба сега и веднаш да поднесе неотповиклива оставка. Ако тоа не го направи, тогаш градоначалникот Јовчески има обврска да покаже одговорност и во насока на заштита на јавниот интерес, да го разреши директорот на ЈКП „Водовод и канализација“.
