Средба на претседателот Пендаровски со министерот за надворешни работи на Романија, Богдан Ауреску

Претседателот Стево Пендаровски денеска го прими министерот за надворешни работи на Романија, Богдан Ауреску, кој е во работна посета на Северна Македонија.

На средбата беа разменети мислења за севкупните билатерални односи, што се карактеризираат со конструктивен и отворен политички дијалог, базирани на пријателство и меѓусебна почит. Претседателот Пендаровски изрази уверување за нивно натамошно унапредување, како на политички, така и на економски план.

Претседателот упати благодарност за силната романска поддршка како за македонското европско досие, така и за динамизирањето на евроинтегративниот процес на земјите од регионот. Тој истакна  дека Северна Македонија останува посветена на остварувањето на оваа стратешка цел, и покрај предизвиците.

На средбата претседателот Пендаровски потенцираше дека особено денес е евидентно дека проширувањето на ЕУ кон Западен Балкан е безбедносен приоритет за Европа, а завршувањето на европскиот проект е клучно за обезбедување на долгорочен мир и просперитет за континентот.

Честитајќи ја 15-годишнината од членството на Романија во Европската Унија, претседателот Пендаровски оцени дека земјата е пример за трансформирачката моќ што ја носи членството во Унијата.

Претседателот Пендаровски и министерот Ауреску разговараа за случувањата во поширокиот регион, во однос на руската инвазија врз Украина, нивната безбедносна импликација врз поширокото соседство.

Како членки на НАТО, двете држави демонстрираат единство и меѓусебна соработка, особено во светло на руската воена инвазија на Украина.

Претседателот Пендаровски се заблагодари за романската помош при евакуацијата на македонски државјани од Украина и оддаде признание за посветеноста на Романија во згрижувањето на големиот број бегалци.