ПУБЛИКУМ Вистината на прво место
Министерот задолжен за комуникации, отчетност и транспарентност Роберт Поповски, денеска оствари средба со претставници на Меѓународниот републикански институт (ИРИ) Овен Паун, директор на ИРИ, Олин Ветингтон, член на Управниот одбор на ИРИ и Илина Мангова, раководител програмата на Меѓународниот републикански институт (ИРИ) во Северна Македонија.
„Стратешките заложби за транспарентност и борбата со лажните вести мора да продолжат и понатаму, без оглед на тоа кој ќе дојде на власт. За таа цел мора претходно да ги едуцираме граѓаните преку воведување на медиумската писменост и во формалното образование“, рече на средбата министерот Поповски.
Тој ја подвлече важноста од етаблирање на професионалци во Агенцијата за аудио и аудиовизуелни медиумски услуги.
Поповски додаде дека оваа Влада за прв пат создаде професионален сектор за информирање кој, меѓу другото, ја промовираше транспарентноста на сите буџетски трансакции, подвлекувајќи дека во наредниот период од особено значење ќе биде бескомпромисната борба со криминалот и корупцијата како и остварувањето реални реформи во судскиот систем.
„Сите заедно треба да ги туркаме сите институции во насока на поголема транспарентност и борба против корупцијата“, подвлече Поповски.
Претставниците на ИРИ ја поддржаа досегашната соработка со Владата на Република Северна Македонија и изразија надеж дека таа ќе продолжи. Тие истакнаа дека инцијативите и реформските процеси што ги остварува оваа Влада се од огромно значење за иднината на земјата и упатија честитки за успешноста. Од ИРИ ги поздравија заложбите на Владата за професионално информирање и понудија експертиза за сензитивизирање на јавноста за лажните вести.
