ПУБЛИКУМ Вистината на прво место
Прес-конференција на Богданка Кузеска, портпаролка на СДСМ
Почитувани граѓани,
По вчерашната средба имаме нови околности на политичката сцена во земјата.
Претседателот на ВМРО-ДПМНЕ, Христијан Мицкоски, јавно кажа дека ВМРО-ДПМНЕ не е против уставните измени.
Мицкоски и ВМРО-ДПМНЕ де факто го променија ставот, прифатија уставни измени и прифатија учество во Влада за европска иднина на паритетна основа, со ист број на министри.
Дури и условот ДУИ да не биде дел експресно беше прифатен од страна на ДУИ, само да не се измислуваат нови и нови услови.
Од друга страна прифатено е барањето измените на Уставот да важат одложено, односно од денот на одржувањето на втората меѓувладина конференција.
Барањето за избори што понатаму ќе ги спроведе заедничката влада исто така е прифатено.
СДСМ како одговорна, државотворна партија повторно покажа државнички капацитет и уште еднаш потврди дека иднината на граѓаните и интересот на државата се на прво место.
Сега врз основа на новите околности на политичката сцена потребно е дијалогот да продолжи.
Македонскиот јазик и македонскиот идентитет се целосно заштитени.
Преговарачката рамка во себе ги содржи сите гаранции, преговорите се одвиваат и ќе продолжат да се одвиваат на официјален македонски јазик, без фусноти и додавки, јазик рамноправен со останатите јазици на ЕУ.
Дополнително, една голема европска држава наскоро ќе донесе Резолуција со која се потврдува дека се препознава и признава недвосмислено македонски јазик, идентитет и македонска култура.
Почитувани,
Членството во ЕУ е стратешка цел на државата, врвен приоритет на генерации македонски граѓани и оттаму, обврска на сите политички субјекти да се реализира таа цел.
Потребно е национално единство да го заокружиме овој процес, да обезбедиме европска иднина за сегашните и идните генерации.
Во одговор на новинарско прашање, Кузеска ја потврди информацијата за свикување на Централниот и Извршниот одбор од страна на претседателот на СДСМ и премиер , Димитар Ковачевски.
„Како што кажав и во оваа прес-конференција, после вчерашната сдредба имаме нови околности на политичката сцена и токму тие нови околности се повод за свикување на Извршниот и на Централниот одбор а секако дека тема ќе бидат начинот и формата со која што понатаму ќе продолжат преговорите со ВМРО-ДПМНЕ“, изјави Кузеска.
