Во Музејот на РСМ на 18 мај се отвора изложбата „На Срем“

Музејот на Република Северна Македонија ќе го одбележи Меѓународниот ден на музеите – 18  Мај, со отворањето на изложбата „На Срем“, информираат од оваа музејска установа.

На изложбата ќе бидат поставени над 120 фотографии, селектирани од богатата фото документација зачувана во Музејот. Низ слика и текст, изложбата го следи борбениот пат на македонските единици, офицери и борци, како и нивните премрежја на Сремскиот фронт и во завршните операции за ослободување на Југославија и за победа над фашизмот, во последните месеци од Втората светска војна.

„На тој начин, уште еднаш се навраќаме на овие настани и се потсетуваме на придонесот на нивните учесници во крајот на војната, како значаен македонски придонес во заедничката ослободителна и антифашистичка борба“, се вели во соопштението на Музејот на РСМ.

Автор на изложбата и на текстот за каталогот е м-р Здравко Стојкоски, кустос – историчар во Музејот. Изложбата ќе може да се посети во периодот од 18 мај 2021 година во 12:00 часот, до 31 август 2021 година, со придржување кон протоколите воспоставени поради пандемијата со ковид-19.

Реализацијата на оваа изложба соодветствува и со темата на овогодинешното одбележување на Меѓународниот ден на музеите „Иднината на музеите – Опоравување и презамислување“. Кризата настаната со пандемијата ги поттикна музеите да изнаоѓаат нови форми на културни искуства, со значаен фокус на дигитализацијата и на промоцијата на музејските содржини на социјалните мрежи. Во таа насока е и реализирањето на оваа изложба. Имено, на 9 мај 2021 година, изложбата „На Срем“ беше поставена во дигитален формат, на новата електронска платформа на Музејот – www.izlozba.mk.

Извор: МЕТА