ОН се вознемирени поради повици за иселување на Палестинците

„Многу вознемирен од изјавите на високите израелски функционери за плановите за префрлање на цивили од Газа во трети земји“, напиша Високиот комесар на ОН за човекови права, Фолкер Тирк на платформата X. Тој додава дека „меѓународното право забранува присилно пренесување на заштитени лица во или од окупирана територија“.

Израелскиот министер за национална безбедност Итамар Бен-Гвир во понеделникот (1.01) повика на промовирање „решение за поттикнување на емиграцијата на жителите на Газа“ и повторно воспоставување на израелски населби во Појасот Газа. Неговите коментари уследија еден ден откако екстремно десничарскиот министер за финансии Безалел Смотрич повика на враќање на еврејските доселеници во Газа, додавајќи дека Израел треба да ги „охрабри“ околу 2,4 милиони Палестинци да ја напуштат територијата .

Израелската влада на премиерот Бенјамин Нетанјаху, од почетокот на војната во октомври, официјално нема предложено планови за иселување на жителите на Газа или за испраќање еврејски доселеници назад на територијата.

Борбите на Блискиот Исток избувнаа откако палестинската милитантна група Хамас го нападна Израел на 7 октомври, при што загинаа околу 1.140 луѓе, повеќето цивили. Како одговор, Израел вети дека ќе го уништи терористичкиот Хамас, започнувајќи со бомбардирање и копнена инвазија што претвори делови на Газа во урнатини и, според Министерството за здравство во Појасот Газа, однесе најмалку 22.313 животи. Огромно мнозинство од жителите на Газа беа принудени да ги напуштат своите домови поради речиси тримесечните борби меѓу милитантите на Хамас и Израел.

Извор: DW