Пишува: Зоран Милошески

Пожарот кој трет ден гореше на потегот од село Рилево па сѐ до близина на манастирот кај село Зрзе, општина Долнени, денеска е конечно изгаснат.

Покрај припадниците на Територијалната противпожарна единица (ТППЕ) Прилеп, во акцијата за гаснење на пожарот се вклучија и авиони на Дирекцијата за заштита и спасување, како и поголем број вработени од прилепските јавни претпријатија.

Информацијата ни ја потврди градоначалникот на Прилеп, Илија Јованоски кој во текот на вчерашниот и денешниот ден, исто како и синоќа, се наоѓаше на терен кај манастирот во село Зрзе. Токму на негово барање, во гаснењето на пожарот се вклучија и авионите за гаснење пожари.

„Со огромно залагање на пожарникарите од ТППЕ во Прилеп, на поголема група вработени во Тутунскиот Комбинат и јавните комунални претпријатија од Прилеп, но се разбира и со огромната помош на авионите од Дирекцијата за заштита и спасување, денеска во попладневните часови пожарот беше изгаснат. Поради интензитетот кој го доби пожарот, како и непристапниот терен, постоеше опасност тој да се приближи до манастирот ‘Св.Преображение’ во непосредна близина на село Зрзе. Од тие причини побарав помош и од Владата, после што со договор и дозвола на министерот за внатрешни работи, Оливер Спасовски, веднаш беа испратени авионите за гаснење пожари. Во моментов се наоѓам во манастирот „Св.Преображение’, заедно со владиката Климент и можам да потврдам дека пожарот е целосно ставен под контрола, а манастирот безбеден“, изјави прилепскиот градоначалник Илија Јованоски.

Заради превенција од повторно разгорување на пожарот, екипи од ТППЕ Прилеп и од јавните претпријатија, ноќеска ќе останат да дежураат на теренот каде во изминативе денови беснееше огнената стихија.