ПУБЛИКУМ Вистината на прво место
Кај грчкиот главен град Атина и денеска, трет ден по ред, беснеат пожари, додека земјата очекува нов топлотен бран што дополнително ќе ја зголеми опасноста од шумски пожари, јави грчкиот весник „Катимерини“.
Со првите зраци на сонцето, утринава противпожарните авиони продолжија со истурање вода кај местото Мандра, западно од Атина, и во Лутраки, близу Коринтскиот канал. На терен, пожарникарите цела ноќ се бореа да го сопрат ширењето на огнот и подалеку од рафинериите за нафта на брегот.
Пожарот што избувна во понеделникот кај Дервенохориа, на 30 километри северно од Атина, бргу се ширеше од непредвидливите ветришта и вчера стигна до Мандра, при што беа опожарени куќи и беше вршена евакуација на населението.
Четири авиони се испратени на помош од Италија и Франција и денеска треба да почнат со гаснење.
Пожар избувнал и на островот Родос, при што биле зафатени десетици куќи и стотици жители морале да бидат евакуирани.
Ризикот од појава на шумски пожари и понатаму останува екстремно висок низ целата земја, предупредува грчката Метеоролошка служба. Грција тукушто излезе од првиот голем топлотен бран, а новиот се очекува да почне утре.
